«Պողպատե» մանդատ VS չթաղված դիակներ. 7or.am  

7or.am-ը գրում է.

Համացանցում տարածվել են ԱԺ խոսնակ աշխատող Ալեն Սիմոնյանի և մասնագիտությամբ Նիկոլ Փաշինյանի աներձագ աշխատող պատգամավոր Հրաչյա Հակոբյանի տժժալու կադրերը։ Հունական կղզիներում։ Շատ թանկարժեք հանգստավայրում։

Փաստորեն, Արցախի Հանրապետության մնացուկների 30–ամյակի միջոցառումներին մասնակցելու փոխարեն Ալենը նախընտրել է տժժիկները։

Հանուն արդարության պետք է նշել, որ Ալենը սեպտեմբերի 2–ին միգուցե կուզենար ձևականորեն գնալ Ստեփանակերտ, մի երկու սելֆի աներ, սրտաճմլիկ տեքստ արտասաներ, բայց քանի որ Ալիևն արգելել է դա անել, ուստի ինքը մեկնել է տժժալու։ Այսինքն՝ արել է սրտի ուզածը, այլ ոչ թե պաշտոնի բերումովը։

Հանգստի իրավունք ամեն մեկն ունի, բայց երբ դու ողբերգություն և հազարավոր զոհեր բերած քաղաքական առաջնորդի նշանակած ԱԺ խոսնակն ես, այսինքն՝ պետության առաջին դեմքերից մեկը, երբ երկիրդ քո քաղաքական թիմի պատճառով մազից է կախված, երբ դեռ չթաղված երեխեք կան, երբ գերիներ կան, երբ օրեր առաջ դեմքի մտահոգ արտահայտությամբ ԱԺ–ում հանդիպում ես կազմակերպում զոհերի ու անհետ կորածների հարազատների հետ և ասում, թե բա գիշերները չենք քնում, ամեն օր ու ամեն րոպե մտածում ենք զոհերի ու գերիների մասին, ահա այս ամենի ֆոնին Հունաստանում տժժիկներ անելն անբարոյականություն է։

Այդ կարգի պաշտոն զբաղեցնելը, Հայաստանի ներկա վիճակն ու տժժիկներն անհամատեղելի են։ Սա ցույց է տալիս, որ կա՛մ Ալենը չի հասկացել, թե ինչ ողբերգություն են բերել իր շեֆն ու իրենց թիմը, կա՛մ էլ հասկացել է ու թքած ունի այդ ամենի վրա։ Երկու դեպքում էլ շատ վատ է։

Հունական կղզիներում թանկարժեք տժժիկներն, ի դեպ, անհամատեղելի են նաև Ալեն Սիմոնյանի ու աներձագ Հրաչի հայտարարագրած եկամուտների հետ։ Աշխատավարձով ապրողի կերպարի տակ թաքնվողներին որտեղի՞ց այդքան գումար, որ նման թանկ կայֆեր են անում։ Չեն ուզո՞ւմ հպարտ քաղաքացիներին բացատրություն տալ։

Թալանից խոսող ու աղքատությունը գովերգող սույն քայլարածները հանգստանում են հազարավոր եվրոներ արժեցող հյուրանոցում և «ցկցկում» այնպիսի փարթիներում, որտեղ ամենաէժան շամպայնի գինը 3.000 եվրո է։ Քայլարած պատգամավոր Բաբկեն Թունյանի հարևան «Պողոսը» տեղյա՞կ է այդ մասին։

Ահա թե ինչ նկատի ունեին նիկոլենք, երբ հայտարարում էին «պողպատե» մանդատի մասին։ Սրանք հիմա ինչ անում են, այդ մանդատի անունից են անում՝ առաջնորդվելով «Անասնաֆերմայում» նկարագրված սցենարով։

Սրանք նախկինում քննադատում էին պաշտոնյաներին, թե բա այդ թալանչիները դրսի թանկարժեք հյուրատներում են հանգստանում, իսկ ժողովուրդն աղքատ է ու հացին կակա է ասում։ Հիմա նիկոլենք են անում այն, ինչը քննադատում էին ու խոստանում էին չանել։ «Անասնաֆերմայի» խոզերի պես։ Իսկ մենք դեռ չթաղված դիակներ ունենք։ Մի մասին դեռ չեն գտել ու դժվար թե գտնեն․․․